أجالسهم وتسرقني هواجيسي من الجلّاس
ويقطع لي هواجيسي البدر ويلطّف إحساسي
من يرجّع لي الماضي ومن ينفض غبار الياس
من يرجّعني صغيّر... بلا همٍّ يفكّ راسي؟
أنا صاير طموحي أترك الدنيا وأهدّ الناس
وأسولف للشجر والطير لين يهدّني نعاسي
طموحي أرتفع وأطيرْ مثل عبّاس ابن فرناس
وأخلّي الكوكب وأترك معه حزني وهوجاسي
على أني ثابت وقلبي على الدنيا شديد الباس
ولا يقدر أحد مهما بلغ قدره على مْساسي
غدا دمعي سريع هطول كلّ ما ذعدع النسناس
أحاول أكتم شعوري وكلامي... لآخر أنفاسي
حلم عمري يزين الوقت وأسرّح أنا الحرّاس
من أبواب الفؤاد اللي لفرحة عيشته ناسي
على ضيق الزمن تبقى القصايد فسحةٍ للناس
يسوق الشاعر أبياته ويليّن خافقٍ قاسي