جاني المطر قبل المعاد
فر أوراق الشجر
إحساس عفي كيف يتكسر
معرفش ليه غاوي عناد
والفجر اللي سكته ترش الندي
الليلة مكتفه مليون بعاد
عشرين سنه والحب نفس الحب
بنفس الملامح والصفات
عشرين سنه طيبه عدت
كل حنان الأمهات
عشرين سنه خلصوا قوام
لخصتهم لحظه سكات
تبتدي فيكي المشاعر
م النهارده اتغزل نهار جديد
لون أغمق م اللي فات
اتكسرت كل الأماني
والحلم اللي كنت بسنده
النهارده مات
لملمت معني الامل
يجي ميتين مره
وحلفت اقوم افرح
اتبليت بافراح مره
واللي حس معاكي الدفا
يلقاه فين بره؟
والجسم الهزيل ف الضله
محاملش حتي الضمه
شبابه راح منه
فارقته الهمه
اصله كان يلم شقاه
ويتداري فيكي
يلبس اللبس الجديد
رغم همه
وكل همه يوطي
يحضن بس ايدك
انت عارفه...
بلقاكي سارحه ف الوريد
كل فين وفين
بلاقي صوتك يحكي عني
وعن اختي وعن امي
بلاقي منك حبه حلوه
من الذكريات
بعدك خلاص حتى ليلي
اتبري من لون السواد
بعدك خلاص
الشعر معادش يفرق
نغمه طيب او نشاز
معدوم يا معني الصبح
ويا صوت الهتاف
معدوم يا كل مغني
يا نغمه توصف لنتصار
تحتكم فيا الظروف
ويندفن معاكي الاختيار
غطت الألوان سحابه
وانت بتاخدي أخر قرار
كان كل همي الاستجابة
وأنا بدق باب الانتظار