غيبتك عندي ترتبط في حضورك
جيت ورحلت ويا كثر شي بالبال
بديت في زلزال واشعلت نورك
وعند الرحيل اطفيت نورك بزلزال
ما قول لك مثلت واتقنت دورك
بس أسألك عن حب مثل الجبل زال
من يفهم احساسك ويرضي غرورك
بعدي .. ولا يحتاج نظرب لك امثال
من يمسح دموعك ويغري سرورك
من يحتويك افكار واقوال وافعال
من يقنعك لا من تجاوزت طورك
انك تعود وحكمته طولة البال
من تلتجي له لانجرحت بشعورك
تقبل عليه بحال وتروح في حال
غيري .. وتذكر لا تبين قصورك
اضحك واعده من دعابات الاطفال
وان اعترف قلبك وروحك وحورك
واشيا كثيره فيك تشعلني اشعال
وفتحت لي كامل مداك وجسورك
وناقشتني باحلامك البيض وامال
ونثرت من حولي شذاك وزهورك
وجلستني بظلال وانته بلا ظلال
واذكر الى جا واحدٍ من طيورك
سولفت له والطير للحب مرسال
طيرٍ عشق صوتك وهام بعطورك
معذور لو ياقع على الغصن مامال
هذي الحكاية قبل يظهر فتورك
حنا انتهينا ليش نكذب ونحتال ؟؟!!
ارحل معي ذكراك تسمح امورك
ارحل لو ان بداخلك قلب رجال