يا غيابك

يا غيابك..

أسهل دروب الضياع اللي بها قلبي يمر!

وأوسع أبواب السهر للعين واصلبها أمر!

يا غيابك..

جمرةٍ ما تنطفي..

لين انطفي!!

والغياب يتساوى..

يوم..

أو حتى.. شهر!

لكن انتي..

كل ما غبتي.. أفارقني عُمر!

من رحلتي..

صرت اشوفك في قصايد أحمد الصانع ورقة شهرزاد

في ملامح من شتات..

صرت أحسك في حروف عقاب لا غنّى الغياب..

في طهارة فاتن وضحك العنود

في براءة شيخة الكتبي وف احساس الهنوف

ألمحك في غربة استقلال وف ضحكة أخوي

واتنفّس ذكرياتك مثل عطر الليل لا هز الصباح

في حكاية من مشاعل..

في سوالف مريم ب ذاك الطريق..

في رسايل فاطمة.. واحزان عارف..

في حروف إيمان وف دمعة هديل

في قناعات الغريبة شوق..

واتنّهد..

لا قريتك في سطور الضوّي ونبضات سامي

في عذوبة عذبة وألحان صالح..

وادري انك شي ثاني..

لا لمحتك.. من مكاني..

في رومانسية عوض نفاع وإيقاع الأغاني

في جنون الراشد احياناً وفي صمت الصدى

في فضاءات الأماني وابتهاج أبرار لا طال المدى!

صدقيني..

من رحلتي..

صرت اشوفك.. وين ما امشي..

في شظايا!!