قلبك يغرّك وانت فالحب تحتال
وشلون شايل بين الاضلاع قلبك
مدام مالك بالهوى ( فيّ ) وظلال
مايختلف لو شفت سلمك وحربك
كنت احسبك تعطي على كل الاحوال
واثر العطا ما وافق بيوم دربك
عشتك ( ألم ) كلك متاهات وهبال
معنى العذاب وجاير الهم قربك
طبعك تجاوز للاسف طبع ( الانذال )
ليتك تحس بحرّ ( نارك ) وكربك
في داخلي يبني لك ( الكره ) تمثال
بين ( الحنايا ) لو تصورت يربك
خنت العهود وجيتني ( حيل ) تختال
الوجه شرق و ( نيتك ) يم غربك
غدرك معك في داخلك ( حي ) ما زال
ماهو غريب ان صار ( زادك ) وشربك
لا تحسبن جروح مثلك على البال
من صد ( جيشك ) قادر إيبيد ( سربك )
مات الشعور ولا بقى فيه ( مثقال )
تعبت اجامل وادفع ( اتعاب ) كذبك
خذها صريحة واصدق القول ينقال
هجرك دواك وزايد ( البُعد ) طبك
وش تنتظر بالله يا متعب الحال
إرحل ولملم مع بقاياك ذنبك
ماعاد قلبي ينظرك ( عزّ ) واجلال
لو ( مت ّ ) عنده ترتجي ما شعربك
فرصه عطيتك وانتهى وقت ( الامهال )
اعلنت فيها ( للملأ ) موت حبك