ياخاطري مال الجبل غيرك ولا لك غيره
لوكان طبعه من صليب الحمل صلف وقاسي
الوقت ينحت صفحته والناس تنكر خيره
والصمت دايم عادته من زود ماهو راسي
جيته وأنا كلي عنا همّ وعذاب وحيره
بثّيت له شكواي مدري بحت له بإحساسي
قلت الفكر في دنيتي مازال حايم طيره
أزفر من الحيره وصدري محترق بأنفاسي
غريب ومسافر ولالي لاوطن لاديره
أسكب لخلاني عسل واشرب مرارة كاسي
ما حيلتي لاصار حبلي منقطع في بيره
ودلو الرشا ماردني عند الضما عن ياسي
إحساسي المرهف طواني ياعنا تأثيره
يرميني لبرد الشتا عاري ويسلب فاسي
شفني وانا لاتاهت الخطوات مالي سيره
غير التصدد لاطرى همي وغاب انعاسي
لين اعتزلت اللي لهم عند العطايا ميره
ماهو غرور ولاجفا لكن حجبت اعماسي
لن الكلام يخونني لا بحت به تصويره
وأطيح كلي لاخذلني عندهم متواسي
حتى سكوتي مايجمّل يحتمل تفسيره
يغري مطاله لاطواني فضفضة جلاسي
وش حيلتي حزني يطوف بخاطري ويديره
ويطيّر العصفور من عشّه ويدوش راسي
هذا أنا واللي بجوفي ماحصل تقريره
بعيد مايلمس وجوده من يغيض أوناسي
مادام صمتك ياجبل ثابت كفاني غيره
ما ابوح انا لغيرك ولاغيرك لقيت مواسي
جيت أشتكي لك ياجبل حرفي نقش تعبيره
كتبت لك فوق الحجر مدري على قرطاسي
غنيت لك يامن فرض من هيبته توقيره
حرفي قبل لاينغلق معناه في كراسي
مكانتك عندي لها جوف الحنايا سيره
حملتها رغم الجفا داخل قرين اقواسي