قومي انثري شعرك.. أبي يظلم الجو
يكفيني نور الوجه.. ما أريد ثاني
نور القمر من نور حسنك أخذ ضو
ويغيب نوره يوم شخصك يباني
وجهك إليه الناس شدّو.. وحلّو
به يهتدي اللي مضيعين المكاني
بك ينتشي العالم وهالكون يحلو
لاشك دونك فاني السعد فاني
محظوظةن بك بوظبي وحيل تزهو
وتشتاق لو إنك تغيبي ثواني
من دوس أقدامك نواوير تنمو
ولمسة يديك تعالج اللي يعاني
نطقك عسل.. بلبل على الدوح يشدو
يا ملهمة الألحان حسن الأغاني
يا دار زايد كل الأفراح ارجو
لك وأغبطك شوفة حسين الثماني
قومي أهمسي بالحب يتعدل الجو
وجو الخليج يتحول لجو ثاني