يافرحة الهاجس وعطر التعاليل
واجمل هدايا واقعي من خيالي
ياعذبة الاحساس يانسمة الليل
من يوم جيتي بان فرق الليالي
كان السهر قبلك هموم وغرابيل
واحزان تاكل من عنا الوقت حالي
واليوم معك وفيك صرت اختلف حيل
معك انتهى حزني .. ومرتاح بالي
غرقت من حبك بسيل التفاصيل
ماكن غيرك بالمحبة طرالي
معسول هرجك مثل وبل المخاييل
عذب على سمعي على القلب حالي
صوتك حديث الورد بحة مواويل
يشعل حنيني يرتفع بإحتمالي
والضحكة اللي تذبح القلب وتهيل
لاضقت بظروفي تصير الدوا لي
كنت اتمنى واحد مثلك يخيل
على سماي ... ويستفز إشتعالي
والحين طاب الفكر يامسرج الخيل
لدروب سلمي من معارك قتالي
باكتب قصيد ٍ فيك من قبل ماقيل
دامك حلالي .. فالقصايد حلالي
احمد الناصر الأحمد
احمد الناصر