صبّ لي مالك علي الا شرابك ..
لو على سد الشرايين .. ارتويتك !!
تدري اني ماذخرت الا.. زهابك ..
وتدري اني ماخذيت الا.. عطيتك !!
والخيال اللي من الغفله سرابك ..
لو شكاني منك.. ماجيت اشتكيتك !!
قبل لاتحسب جفاك.. احسب حسابك ..
انك الرجم الوحيد.. اللي رقيتك !!
إرتقيتك من ذهابك.. ل إيابك ..
كل ماجيت انتهي فيك.. ابتديتك !!
كني الدرب الطويل .. اللي مشابك ..
وكنك خيوط الظلام.. اللي سريتك !!
اوصلك .. لكن قبل.. ذنب ارتكابك ..
جيتك من اقصى الضمير .. ولا لقيتك !!
مالقيت.. الا وقوفي عند بابك ..
ولا صحيت .. الا وانا قدام بيتك !!
ولا وصلني منك.. غير اقسى عتابك ..
لين ضاقت دمعة العين .. وبكيتك !!
ليت مايطري من التفكير.. جابك ..
وليت مفتاح الرضى.. كلمة رضيتك !!
وليت مافكرت مره .. في غيابك ..
وليتني بعت الاوادم .. واشتريتك !!
وليت .. ماحطيت فوق القلب نابك ..
كان لاجيتك على بابك .. لقيتك !!