اما عن الأخطاء حدث لاحرج
اخطي وناري ماتشب الا حطبي
مابرر الغلطه ولا ادور حجج
درس تعلمته ودرس مربي
اندم طبيعي بس ادور عن فرج
واضح مع نفسي ولاني بختبي
اطيح وامشي بس ما امشي عرج
امشي ولو مكسور لكن ما حبي
فكري كبر وياي حتى انه نضج
وبعض التجارب تعتبر من مكسبي
خشمك اهو خشمك ولو انه عوج
واقعك هو واقعك وافهم ياصبي
راضي انا بذاتي ولو غيري هرج
متصالح وياي عارف وش ابي
تناقضي واقع وانا اشوفه مزج
بين السهل والصعب ابحر مركبي
ارضي وجمهوري اذا يوم انزعج
تكتيك مني يتضح في ملعبي
اتدارك الموقف ولو كثر العجج
الفوز فوزي والخسارة بسببي
في احلك اوقاتي وانا عندي نهج
ماكنت مستسلم لاني مو غبي
واضح مع نفسي ولا عندي حرج
خطاي بعضي بس شاله منكبي