الله من قلبٍ عليل ومحتار
مارتاح يومٍ من عنى الهم سالي
ضاقت عليه بناظري كل الأقطار
يرف له بين الضلوع اجتوالي
لولا ضلوعي كان من ضيقته طار
حقيقةٍ ماهو كلامٍ خيالي
على وليفٍ مالفت عنه الأخبار
أبعد وخلاني وحيدٍ لحالي
هاذي دياره ممحله بعد الإزهار
وهذاك منزاله من الناس خالي
ما باقيٍ منها سوا شبه تذكار
حتى الملامح غيرتها الليالي
وقفت فيها وتفكر بما صار
بأطلالها وأنظر بها كل عالي
لي فيه ذكرى واتسلى بالأشعار
وأنااعرف أني عنه ماني بسالي
أقفت به الايام واولاد الاشرار
والبعد عذب حالتي عزتالي
حسيت زاد الوجد في قلبي النار
احرق لهبها مابقى من احتمالي
خلاص مالك ياالأمل باقي اثار
ودي اعيش بوحدتي وانعزالي