الله من حاجةٍ ماني بوياها
ودي ولكنها ماجت على ودي
راحت وعيني بعدها نثرت ماها
لو ماهي بغاليه ماسيلت خدي
هاذي ثلاثة سنين اعيش فرقاها
واقول عدت وانا اكذب كيف بتعدي
لاوالله الا بقت فالبال ذكراها
ووسم بقلبٍ لها سلمته بيدي
رسمت الاحلام في بسمة محياها
وخابت جميع امنياتي ووقفت ضدي
من لامني في غلاها جعله فداها
ابو احساس بليد وقلبٍ مصدي
هاذي هي الحاجه اللي ما تمناها
الا سلايل عزيزٍ رايه مقدي
اليا مشت تزهر البيداء لماطاها
وليا وقفت كل غصن يميل ويندي
بحاول اصبر على الدنيا وبلواها
لو ان الايام ماعطتني على قدي
تحدني حاجتي وانا اتحداها
ماتبرد عزوم من جده مثل جدي