يا رب صبرني على أمرك وبلواك
واجبر عزى من شاف ضيم العزاير
مثل الدريك اللي على حوض الأدراك
يبكي ودمعه فوق الأوجان جاير
يا عين هلّي ذارف الدمع سفّاك
وابكي وهاتي ما خفى من عباير
يا عين لا تبكين هذا ولا ذاك
إلّا ولا فرقا الأهل والعشاير
ابكي على سمح النبا حسن الأسلاك
اللي عليه مغزور الدمع فاير
قلبي عليه من الولع فيه دكاك
والحال مني خلصت بالحساير
كنّي ربيط الروم في وسط شبّاك
وإلا كسيرٍ موجعته الجباير
قِدْم العرب غادٍ بشوش وضحّاك
والكبد يصلاها لهيب السعاير
يالله يا والي تصاريف الأفلاك
يا مطفي نار السنين العساير
يا من لعسرٍ من الشرابيك فكاك
رب السماء والي جميع البصاير
اسالك من فضلك وجودك وحسناك
تجمع بشملي مع ظبي الزباير
الجادل اللي يصقل السن بالراك
حاوي محاسن محسنات الخداير
سبّة عزاي وصار للروح ملاك
وأرخصت له عمري وما بالذخاير
يا زين روحي يا أريش العين تفداك
حيثك هواي وعن هوى الغير ذاير
عليّ نذر إن ولّف الله لاماك
لا أرز رايات الفرح والبشاير
وأصوم لله ما تيسر لعيناك
وأبني لحبك بالضماير مناير
يا زين يا عذب اللمى كيف أبنساك
والحب سلطانه على القلب جاير
يا مورد الخدين ما أحلى سجاياك
يا سيد كل المترفات النضاير
سهرٍ وأنوح بنوحْ ورقٍ على الراك
مع ذا تصفقني ركون العواير
يا أبو محمد يا فتى الجود بأنخاك
يا فرحة المضيوم يوم الكساير
شف لي طبيبٍ شاطرٍ لا عدمناك
كوده يداوي علةٍ بالضماير
وإلا فأنا يا معدن الجود وإيّاك
نركب على ثنتين عوصٍ حراير
يومين والثالث على الهون ملفاك
هجرٍ منازل من له القلب طاير
فإلى لفينا ديرة الربع ذولاك
فالوصل يطفي ما لجا من زفاير
أمسي وكنّي مالك كل الأملاك
أملاك سلطان الهجر والجزاير
والى لفينا دافع الله مناياك
مرخوص يا مروي السيوف الشطاير
وإن كان يطيب الكيف لك فأنت برضاك
نقعد أنا وياك للحول داير
يا أبو محمد عانك الله وعافاك
وأذراك ربي من حتوف الدواير
شفني من الفرقا ولا الحال تخفاك
مثل المريض انهض ولا نيب ثاير
من فقد طفلٍ للمعاليق مسّاك
الجادل اللي ما يدوس الوزاير
الخد كالقنديل واللحظ فتاك
يغري الضماير والجدايل حداير
وأرجي عسى ربٍ بلاني بهذاك
اللي وداده في حشا الروح صاير
يجمع بشملي يا أريش العين وياك
هالعمر خيره لو بقى للدواير
والختم صلى الله على المصطفى ذاك
محمد المبعوث ما سار ساير