البارحه هاضت هجوسي وغنّيت
وجريت صوتي فالخفاره لحالي
مع هاجس أوجاعي سمرت وتقهويت
وسجّيت فكري في مراكب خيالي
وفكّيت صندوق الضماير وبكّيت
عينٍ جفاها الدمع مبطي وسالي
سيلٍ على سود الجفون وتعزويت
في صبري اللي ما بقى منه تالي
وقمت أتلفّت وش كسبت ووش أفنيت
من عمري اللي راح - واللي بقالي
مكاسب الدنيا كما عود كبريت
وعمرٍ خلا من طاعة الله خالي
حتى الرفيق اللي ذخرته يبا الفيت
لا جار وقتي مسندي ، رآس مالي
يوم الزمن كشّر بنابه ولدّيت
ماغير تصفق في يميني شمالي
وعز الله إني يا جزاء ما تردّيت
لا ف أجنبي ولا قريبٍ وغالي
لكن عزاي بمخرج الحي من ميت
ألوذ به لا عزّ مالي ، وحالي
يارب أنا عبدٍ ضعيفٍ وزليت
ويا كثر زلاتي وطول إنشغالي
غرقت في بحر الذنوب وتماديت
وزيّن لي الشيطان درب الظلالي
جيتك بعد ما ضاق صدري ومليت
رحماك يا ربي عزيز الجلالي