اشكي عليك الحال يا متعب الحال
الحال عقبك صار من دون في دون
ضيق وحزن وهموم والوقت ميال
ولاني بلا صاحي ولاني بمجنون
صدري غدى للهم والحزن مدهال
صابر واكابر مابي الناس يدرون
بعدك سقاني يا اريش العين فنجال
فنجال مر امر مما يقولون
ما تدري. ان البعد والشوق قتال
وشلون اقاوم بعدك اليوم وشلون
ماعاد حالي عال لو قلت لك عال
حالي سواة اللي على الكبد مطعون
يا وجد روحي يا هوى القلب والبال
وجد اللذي غاليه فالقبر مدفون
ابوه مات بليلة العيد واشتال
حمله وحمل اصغار يادوب يمشون
سروه ربعه بعد مامات وانهال
يبكي على مسراه والناس يبكون
دمعي مثل دمعه على الخد سيال
وحالي مثل حاله من البعد مغبون
انا سواة الي حداه اشهب اللال
على السراب الي له الناس يقلون
ياسيد جروحي ترى البعد لا طال
تبكي عيوني منه وتبكي عيون
ابكي عليك اليال وليال وليال
وسيف السهر دايم مجرد ومسنون
تعال الك في داخل القلب منزال
ما يسكنه غيرك لو الغير يبغون
لا تستلذ البعد ياطيب الفال
بعدك جريمه ماخضعت لاي قانون
في غيبتك لاتضيع يازين الامال
اليا متى بكتبك والناس يقرون
عذرآ يقال وعذر والله ماينقال
لا تعتذر تعال وابليس ملعون
في غيبتك حالي ترى ماهو بحال
الحال عقبك صار من دون في دون