شوقي ليك
محمد ظاهر
من الشعر السوداني الشعبي
قادر ربي نعم القادر
يجبر خاطري بعد مخاطر
يجعل قلبي نعم الصابر
بعد الحزن تاني أسامر
قادر ربي وحده الغافر
باعث الروح نهار الحاشر
بعد الموت نقوم لمصاير
ساعة الحر و ضيق و مراير
أملي في ربي هو الآمر
يغفر لي دموعي مجامر
شوقي ليك محمد ظاهر
جيتك يا محمد خايف
ألوذ بي ظلك إنت الوارف
سيدي و سيد قليبي الراجف
خايف الموت و ريقي الناشف
هايب من قبور و صحايف
راجيك أنا يا محمد واقف
تشفع لي تزيل لمخاوف
إنت شفيعنا نعم العاطف
رحيم و رؤوف و لينا تلاطف
نكون جنبك جميعنا نجاور
شوقي ليك محمد ظاهر
يوم الحر نهار الحاشر
أشوف أمي و أبوي في بشاير
و أشوف لأولادي قصرا عامر
و أشوف أم العيال بتفاخر
و أشوف لهداي و أهلي عشاير
قصور و ظلال وعيشا فاخر
نلاقي نعيم يدوم للآخر
و يخدموا فينا حور و حراير
نشكر لي إلهنا الغافر
وهبنا الخير و حسن مصاير
شوقي ليك محمد ظاهر
نصلي عليك صلاة تامه
وتسعد بيك نفس لوامه
ما غطت سمانا غمامه
وما غنت بدوحنا حمامه
وما ذكرت نفس آثاما
و ما خافت حساب و قيامه
وبي عدد النهار و ظلاما
وبي عدد الخلايق عامه
تشفع لينا إنت إماما
وجيتك بي ذنوبي كباير
شوقي ليك محمد ظاهر
جيتك في رحابك نازل
تجري دموعي حسره هواطل
محال بترد في ساحك سايل
حاشاك خلقك عظيما كامل
في القرآن نشوف لفضايل
و ما بتكون لضيفك خاذل
واقع لي حجاك أسايل
يوم الخوف و نار و هوايل
يوم الحر حساب و مسايل
ألاقي حذيفه رابح ناير
شوقي ليك محمد ظاهر
نعيش في الدنيا عيشه هنيه
بذكر الله تطيب النيه
بعد الموت قصورنا عليه
في الجنات حياتنا رضيه
بنات الحور تسامر في
تقولي رسولنا راضي علي
تكون أمي وأبوي حولي
وحذيفه وابراهيم و ثريا
وأشوف أهلي الكرام و ذوي
وأشوف الخير عليهم ظاهر
شوقي ليك محمد ظاهر
ربي كريم يجود بسداد
بعد الخيبه تم لمرادي
أعيش بالذكر وحده أنادي
و امدح لي نبينا الهادي
أكون زاهد من العباد
أبيع الدنيا أربح زادي
تبدل خوفي أمنا بادي
اطمئنان دخل في فؤادي
أقوم الحج ينادي منادي
مرحب بيك حسن يا شاعر
شوقي ليك محمد ظاهر
جيت أتمنى أصبح ناسك
أزور للحج أقضي مناسك
أطوف بالبيت بكسوته ماسك
سائل الله الكريم المالك
قبل الموت و قبل مهالك
يسهل لي طريقا سالك
لا عقبات ولا شي شايك
أوصل طيبه سيدي هنالك
أذرف دمعي أمحو حوالك
نفسي تطيب تبوسلو منابر
شوقي ليك محمد ظاهر
جيتك يا محمد واقع
وجيتك يا محمد سارع
بدورك تبقى حرزي الشافع
تنوب عني وتقيف وتدافع
يوم الحر نهار الفاقع
تبري جروح وتشفي مواجع
تقول قلبي النضيف الناصع
تقول خلوه مافيش مانع
يدخل جنه يلقى مراتع
يلقى نعيم ويلقى جواهر
شوقي ليك محمد ظاهر
محمد سيدي ليك أهاجر
وشاعرك باكي مكسور خاطر
قليبو جريح صديرو مراير
دموعو تفيض بحورا زواخر
أدركو يا محمد بادر
و قلي الوالدين يا شاعر
حواك في الجنه لبسوا حراير
لاقوا ورود ولاقوا سراير
لاقوا عنب و خوخ و فطاير
و أملو كبير في ربو الساتر
شوقي ليك محمد ظاهر
محمد سيدي سيد الساده
طفطف ناري أنا الوقاده
نفيستي اتمزقت ببعادا
إليك يا رب إنت معادا
عوض عمري فقد سعاده
و اصرف عني دمع وساده
ثبت قلبي زيدني إراده
و جود بالصبر يبقى زياده
بحق رسولنا زيل لفسادا
نفيستي الخاسره ترضى تسامر
شوقي ليك محمد ظاهر
تعظم أجري بعد الوالده
تلقى سرور و تلقى الفايده
ناري في صدري شابا وواقده
و روحي اتقلقلت ما راقده
دموعي بتجري روحي الفاقده
قليبي جروحو نار متزايده
وحكمة ربي هي السايده
خلق للروح عرف للعايده
يوم حر السموم الزايده
يحمي الوالدين ويناصر
شوقي ليك محمد ظاهر
محمد سيد قريش وربيعه
وجاتك أمي عابده مطيعه
أبقى جوارا و أبقى شفيعا
تكون مع أبوي لديك وديعه
يدخلوا جنه عاليه رفيعه
في ترحاب وحفله بديعه
وكل ما يطلبوه سريعا
تجيبوا أملاك تقيف سميعه
مافي نزاع و ما في خديعه
يلقوا الحور و حلو مناظر
شوقي ليك محمد ظاهر
الصلوات كتيره كتيره
تنجي الخوه تنجي عشيره
ريّح قلبي من نار حيره
و قلي الوالدين بالجيرة
يلقوا جنه يلقوا سرورا
و يلقوا الخضره زاهيه نضيره
و يلقوا فرش بحشوه وثيره
و يلقوا غرف جميله اثيره
أبوي أمير و أمي أميره
و يلقوا الخير مكمل وافر
شوقي ليك محمد ظاهر
الصلوات ولا معدوده
والصلوات ولا محدوده
عد الروح وعد شرودا
عد الطير و صقر و دوده
وعد غزال وعد أسودا
وعد أفيال وحوت مصيوده
وعد ما سألت نفس معبودا
وعد أنفاس شهيق وردودا
وعد الريح سحاب ورعودا
وعد الليل نهار وبواكر
شوقي ليك محمد ظاهر