أعرفك زين وأنت الزين كّله
و أعرف اللي ورى أحلى ابتسامة
حبّك العذب لا يمكن أملّه
و لا يهزّه جفا وإلا ملامة
في عيونك لقى حلمي محلّه
و عاشقك ما يبي يترك منامه
سلهِم الرّمش، بتهنّى بظلّه
و اتقلّب على خدٍّ وشامة
بك تعلّمت أحبّ العمر والله
و أنت عمري بلا خوف وندامة
فيك دمعي من الفرحة أهلّه
و أحمد الله على نعمة تمامه
تدري أنّ الهوى ما به مذلّة
به نصون المودّة والكرامة
الزعل والرضا كلٍّ يدلّه
و المحب ما يطوّل في خصامه
لو بعاتب بشي واحد، أقلّه ..
كيف تجهل بقلبي واهتمامه!
أطرد الشكّ والتفكير خلّه
و صدق اللي يغنّي بك غرامه