قابلتها صدفة ولي عنّها سنين
كان الوله طاغي بضحكة وعَبرات
قالت عقلت؟ وقلت أنا وش تظنّين؟
للحين مجنونك رغم كلّ ما فات!
عايش على الذكرى وما بيننا البين
أتخيّلك لحظات وأبكيك لحظات
عايش على جرحك وما صار جرحين
ما أكرّر الغلطات "لو كنتِ غلطات"
قالت خطاك أنّك وفي للمقفّين!
اغنم سنينك قبل لا تفوت حسرات
تلقى نصيبك بين هاك الملايين
قلت النصيب بيدّ ربّ السماوات
راحت كما نسمة بدرب البساتين
يبقى شذاها في الندى والمسافات
من يومها هذا مكاني وللحين..
عقلي يقول انهض بس القلب "هيهات"