من يبي يحيا في جنات النعيم
من يريد السعد بابه يدخله
لازم إنه يهيم في حب الحريم
وبالوجد والشوق قلبه يشعله
ولازم إنه يصير للقمره نديم
وعن غرامه مول لا شي يشغله
ولا يفكر مول في العصر القديم
لازم إنه يعيش هذي المرحله
مرحله فيها التطور شي مديم
مرحله بأحلى المزايا حافله
فيها الإنترنت والدش العظيم
لي بسرعه يجيب خبر وينقله
فيه ننظر (م) الصور منظر أليم
من ضحايا هالحروب الشاعله
بس ننظر فيه رعبوبٍ وريم
بأجمل الأزياء يللي نازله
انظر الدنيا وتفكر يا فهيم
عن قبل كل شي أصبح ما أجمله
لا يغرك واحدٍ جاهل غشيم
احذر تقرب منه أو تسأله
بايخلي نفسه انسانٍ حكيم
وبايردك للسنين القاحله
لي بها عاشوا أهالينا في ضيم
(م) الفقر قاسوا أهلنا مشكله
عصرنا هذا عصر وايد كريم
عصرنا هذا نحن نستاهله
فيه كل الزين والأنس المقيم
وأجمل الراحات: قصة لعسله
الولد هاليوم شروات الزعيم
في يديه تشوف هاتف يحمله
عنده سياره يلف بها ويهيم
في الشوارع دون قصدٍ يوصله
والبنت تبحث عن الشخص العليم
بأمور الحب لأجل تغازله
تلبس مشخلع وتلحس لآيس كريم
لأجل ما تغري الولد وتمشكله
وش هو أكثر من كذه نبغي نعيم
وش هو أكثر من كذه نتأمله
العفو يا رب عفوك يا رحيم
ما قصدنا غير شرح المسأله
اهدنا يا رب للدرب السليم
واحمنا بلطفك وعفوك نسأله