تفكَّر لاتوايق يا مسافر جوف جمْ البير
ترقْبْ للحييا لا تذوق السم يا هدار
زمانك لو صفالك لا تحسب انك تصير الزير
ليادارت رحاة الوقت ما يشفع لك المعذار
لو انك تدّعي بالعرف والتجويد والتفسير
تجاريب الزمن لو تكشف المستور، يا ستار
تعلمنا من رجالٍ لهم باع ولهم تقدير
تسمّع في مذاهبهم لجل تاصل لك الأخبار
يقولون الخطأ مردود بالمثقال والقطمير
وطبع الحر ما يرضى بمس الذل ولاّ العار
ومنهو جوّد احصانه عن الكبوات قبل يغير
يقولون العرب فارس وله هيبه وله مقدار
وحمران النواظر فالشدايد ضربها تعزير
ولا تلمح تبسمها سوى في حروة الأخطار
فلو تظهر نواجذها فلا ينفع لك التحذير
ولا ياويك من سطوة مخالبها جدار وغار
تعلّم كيف تفْرقْ للحقايق واعرف التزوير
تشوف السبع وتميز سمات الثعلب المكار
تشوف الفرق واضح قبل لا رجلك تجدَّ السير
حصاة القاع ما تشبه وصوف الكوكب السيّار
وأنا ماني بذا جاهل ولو أني دهنت السير
أداري واحتمي رايي ولا يشغلني الهذار
يعذلوني على حلمي وأنا مرهجني التفكير
وكبدي كنّها تطبخ من العذال فوق النار
صحيح إن الخطأ وارد وجايز مثله التقصير
ومن يمشي طريق النور يشفع دونه المعذار
وأنا مشفق على منهو يلبّي كل داعي خير
لو انك تسمع المرزم ترى صدري عليه زرار