ماعدش فى دمى ولا نقطة م الفضول
ونا اللى خطايا أتبعتر م الفلول
ألم فيها؟ ولا ألم فى روحى م الذهول
إيه اللى باقى ع الوصول
ونا أمشي لآخر الطريق
الصعب... العسير
وإن وقعت ألقى اللى يسند فيا المسير
لحد ماأوصل بألغازى للحلول
الله يلعنها الفلول
جرح الخلايق أتداوا
جرحى وجرحك ماخف
الدمع فيكى ماكف
والكف ضرب على كف
ياترى اللى جايلك هيفضل بعقله
ولا هانصبح نلقا عقله أتهف؟
سؤالات مالهاش حلول
الله يلعنها الفلول
يامصر أتغزل من شالك شالى
ماأملكش غير قلبى
وفى ننى العين تتشالى
تتبسمى فى وجهى تحيينى
تتبسمى للصبح يبقى
ويحط النور على جبينى
لا أعاتبك فى ضيقه ولا تعاتبينى
أسهر على راحتك وألقاكى تسابقينى
أفهمك ونا مغمض وتفهمينى
ماتخليش الجفا بينا يطول
الله يلعنها الفلول
لأمتى هتضيع فيكى الحقوق؟
ودمنا يتحرق فى العروق؟
بنوأد ليه الأجنة فى البطون؟
وندى الأمانة للى يعرف يخون؟
الحقوق ماأتخلقتش للسجون
الظلم ليه يطلعلو ألف عون
والديابه تتدارى فى الدقون
الماعون يا مناعين الماعون
أنا.. أنا ليا مواطنة ولا بدون
مين هيقدر ع الحلول
الله يلعنها الفلول