يقول ابن ظافر تكدر منامه
وملوعه غربال الأيام تلويع
القل والحاجه تهين الكرامة
والعز ضاع وعزة النفس بتضييع
ابا اغترب غربة ذياب وسلامة
شدوا الرحال وودعوا نجد توديع
شدوا الرحال متيهين الجهامة
يتلون ابن سرحان عجل المفازيع
والبعد من دار المذلة شهامة
وبدل المرابيع القديمة مرابيع
بابعد ولا يلحق بعيدن ملامه
والله لخلقه وسع الفج توسيع
وآهج لين اما تقوم القيامة
والا يغيبني الثرى واسلم الريع
غربة عزيز النفس الوقت ضامه
ماهي لليالي ولا هي بأسابيع
على ثرى الغربة يبني خيامه
تايب من ارض القاطعين المقاطيع
ما ينحني راسي لخاطي هلامه
في حكم اخو نوره يصف القراديع
المال عز احماه وارفع مقامه
لا يلحقه بردن ولا يرقد اجويع
يصلح مقهوي في مجالس عمامه
يامر عليه اصغر هل البيت ويطيع
واللحية العشما ونا بالكرامة
تصلح وقاه يلمع البيت تلميع
تنومس الخادم بلبس العمامة
والعبد يشري في هل الدار ويبيع
قاموا يبون اخضاع راعي الزعامة
وهم بايجونه خاضعين مخاضيع
لابد من يومن يغرد حمامه
تطيب به روس الرجال المصاديع
الصقر ما يلفت نظر للقهامه
والنذل ما بيني وبينه مواضيع