نظرة يا السمحة أُم عجن
يا الفي شأن هواك قاسينا المحن
حالنا صبح خراب وأجسامنا إنمحن
لو تعطف شوي أو مرات تحن
كان تلفانا نحن قُبال ما نجن
وكتير الزييّ في الريدا جنوا وغابو
كتير مصاريع الهوى الما إتعرف أسبابو
لو يصفى الحبيب ويفتح للقليب أبوابو
يخضر العمير البدري ولى شبابو
الشابة المن شفتها شبت نار العشق جواي تلهلب شابة
يتشابى الجميع لي شوفها شيب وشبابا
لو طرفك تصيبو من سهام عينيها نشابة
تسرق قلبك المشبُوب كيف شِرعة الشلّابة
ويا شلّابة
نحن غلابة
شن خبرنا بدهاليز الغرام وجرابها
دنيا الريد غريبة حيرت المحب والسابها
كيف الزول تريدو وللريدة فيك يتغابى
وكيف الناس ممكن تبادل العشق بحرابة
وحربك ضدي ما ضرتني
غير زادتني عشقاً ليك
وهجرك ليّ ما قساني
عمري عليك
وقالوا وقلنا ما هزتني
بل قوّتني إيمان بيك
وإن طال الزمن
مشيتي وجيتي
أعرفي يا العنيدة
يا مُنية الروح الوحيدة
إنك الريدا الأكيدة
لا قبلك ولا بعديك