بعتذر عن كل حرف كتبته فيكي
وذكرياتي
عن كل دمعة بكيتها عيني
ألم حياتي
عن كل صرخة أه
كسرت حدود الصمت
عن كل دمعه معاها
بان الأذى والكبت
عن حرفي اللي فيه رعشه
وعن خوف كان ماليه الشوق
عن موج بيسرق قلبه وشراعه
عن غيمه بتنزل مطرها لفوق
عن تيه خيالي، في قلب أحلامه
وعن دمعه الأيام، حكاويها قُدامه
عن ضوء بيترك فى العيون لمعه
ونبض خايف روحه تكون سامعه
انا بعتذر
أسفي الي الجمع الغفير
أنا مش أسير
أنا من اسير الدمع والشوق والحنين
قبل البدايه في قصتي أنا كنت فين
بعد انتهاء الرحله والزاد اتقطع وصلت فين
بعتذر عن حبي ليكي
واحلف كمان مليون يمن
انا بوعدك ما اكونش ليكي
وقطعت بيه حبل الوتين
طلبك خلاص وافق عليه
نبض الحنين جوا الفؤاد
مافضلش غير حبة دموع
فوق خدي حاضرين للمعاد
مافضلش منك غير ندم
حالف عليكِ بالبعاد
مافضلش غير حبة حاجات
متكومين جوا الغيوم
صوره قديمه لذكريات
عطر عالق في الهدوم
حبة تعاسه عن الفراق
سُحب البُكىٰ وحبة غيوم
وبعض المشاهد ضدها
عايش عليها ب عِدَّها
حبة دموع للفرْح في وقت اللقى
مافضلش منك غير أساليب البُكىٰ
اما السعاده فيك فاتبدلت
بخداع عيون مليان عتاب
وانا بعد ما قلبي انتهى
شارد على شكل الغياب
شوَّهتي ليه الصوره في عنيا
كل الملامح ليه محجوبه بضباب
كنتِ الهوى، واسير عنيك
اصبح هواكي ليه سراب
ولّا ارتجالى فى الكلام
كان مش تمام
حاضر خلاص
هسكت اواوم
همنع لسانى من الكلام
واترك ضجيج الحزن
يخرسنى كمان.
سكت اللسان
والصمت عم الكون كمان
واللى باقى من حياتك
صوره مركونه فى زمام
رُكن الحياة والوحده منصوبه معاه
طوق م النجاه
وشراع مخروم م المياه
وسفينه مربوطه بامان
هاجت رياح الغدر قطعتله الشراع
والحبل ماسكلُه على كلمة سلام
والدمع فى العين انسكب،
قالوا من لحظة خصام
زاد الصراع ،
والموج كمان فى البحر هاج
والريح تعالىٰ بصوت وزاد
والقلب كان سالك طريقه لشط تاه
فين النجاه م الحب من قلب الغرق
فين الامان والقلب فينا بيتحرق
وسط الخداع رسم المشاهد ع الورق
دمع العيون مسح الورق
واللى انظلم في الحب كان شاري هواه
بعد الأمان والحب عايش في القلق