تجي نصغر؟
وننسى عمرنا اللي فات
كفاية ما نبي نكبر...
تجي نصغر؟
عمر عشناه أو اكثر
رسم فينا ملامح امس
صغير ووجهي بس يكبر
تبي نصغر؟
وننسى ألف باب وعيب
ولا كنه ملانا الشيب
نعيش أعمارنا بالضبط
ونتجاهل كثير أشياء
ممنوعة بحكم العيب!
وتبي نكبر؟!
أنا ودي أوقفني
واغمض طرفي وجفني
وأتخيل!
يا حلوة كانت الدنيا
بسيطة وناسها جنة
واضحك حيل لأحلامي
اعد بلهفة أيامي
وأقول اكبر... أبي اكبر
أبي دقني يكبرني
وأستاذي... يعبرني
وفي الحارة
أصير فتوة الحارة
من اطلع
يبقى الكل في داره
أنا رجّال هالحارة
يا حلوة كانت الدنيا
بسيطة وناسها جنة
وتبي نكبر!
فال الله ولا فالك
ولا حتى يجي ببالك
أنا ودي ارد صغير
واحذفها من أمانينا
"متى يمه أصير كبير؟ "
كبرنا وليتنا للحين
نلعب حبشة بالشارع
واحد طش اثنين طش
ثلاثة طش... يلا طلق!
ونتهاوش... والله غش
ونتخبى
أبي نرجع لحارتنا
عيال الحارة وحشوني
وشلة فصلي وحشوني
وحتى عبدالعزيز الدب
مع انه كان يضربني
أنا مسامح...
بس نرجع
أبي نصغر...
أبي نرجع لبيت جدي
ونتجمّع
ونستهبل
ونضحك من تفاهتنا...
وإذا أمي بغت تمشي
نمثّل نومنا بدري
عشان ننام ببيت جدي
اشتقت لجدتي نورة
اشتقت لنقش حناها
وحشني خوفها دايم
وفزعتها إذا نغلط
نزعّل أمي إذا نلعب
ونكسر لمبة بالكورة
تهاوشنا وتهزأنا
تجي جدتنا تحمينا
"قسم بالله ولا كلمة"
أبي نصغر...
عشان لجدتي نسافر
ويركبّنا أبوي بجمس
ورب البيت كنه امس
نروح لجدتي سارة
كريمة حيل تعطينا
فلوس تحطها بمنديل
و "تلفزها" بأيادينا
تقول أصحى احد يدري
فلوسك لك ولحالك
وتمر أيام وتمر سنين
ونعرف أنها كانت
تعطي الكل ولا تعلم
تقول لكلنا كلمة:
فلوسك ذي... لا احد يدري
تبيها جد
شلون أصلا قدرنا نعيش
تجبرنا...
وحشني لعبة التطنيش
تغيرنا...
وصرنا النسخة الأسوأ
من اللي كنا نمقتهم
نقول الدنيا ألهتم
نسونا أو تناسونا
وصرنا زيهم بالضبط
ونسينا بعضنا أصلا
نسينا وش يفرحنا
نسينا وش يراضينا
نسينا لعبنا مع بعض
نسينا حتى ماضينا
وفزعتنا لبعض دايم
إذا أنّا تهاوشنا
ونتوعد بعضنا بالشر
بالطلّعة ورني نفسك
ونتهاوش ونتضارب
ونتراضى... ونتصاحب
وبالأخر؟
نسينا ليه تهاوشنا
ونتذكر بس تجمعّنا
لأن قلوبنا بيضاء
ولا تعرف تشيل الحقد
وتبي نكبر!
تصدق لو هي بيدينا
ما كانت ذي أمانينا
محد في الدنيا ذي يقدر
يعيش العمر كله صغير
ولا يكبر...
أقول شي ولا تزعل
حكايتنا كذا اجمل
إذا ودك تصير كبير
أنا ودي اكون اصغر