يسكن بجوفي خوف والخوف نوعين
خوف الفراق وخوف طعم الخيانه
يابو نبيل وصاحبك خاف الاثنين
عزاه ياشيخن تعرض لاهانه
ياليت اوكل للعلاقه محامين
لأطلب من القاضي لقلبي إعانه
حنا خلقنا ياالأوادم ضعيفين
لاتامن القاسي يبين ليانه
والحب مايعرف شيوخ وسلاطين
كنه طفل طارح عليك الميانه
والعاشق اللي يقضي الليل ليلين
اكيد خله غاب واخلا مكانه
ياصاحبي واللي طريقه على الزين
صعبه من المحبوب يفقد امانه
وانا فطين وقادر ألعب بحبلين
واعطي فؤادي مانقص من حنانه
لكني اكره من سقى فكرته شين
وش كان يخسر لو فزع في ظمانه
ياعيشتن تشبه لعيشة مجانين
فعلن اشوفه غير هرج بلسانه
يفز قلبي لا سمعت المذيعين
احساسي ان الغالي مصدر بيانه
في خلي المزيون قلي على وين
رزقي على الله لكن انْها جبانه
يرضيه خلك ضايعن بالميادين
انا ادري انه جاهلن بالبطانه
وأبقى اعيش وفيني الخوف خوفين
خوف الفراق وخوف طعم الخيانه