يامحمد سليمان وشلون الكفاح
في موقف يهزم به الليث الجسور
يا صاحبي والليل يجنح للصباح
وانا جنحت لصوت تسبيح الطيور
ماغير اتمتم واطلب الله السماح
احتاج ظلّه لابعث من في القبور
البارحه روضه حمايه تستباح
من جادلً تفوق رباّت الخدور
عنقا نحيفه خصر ريّانه رداح
ريحة نفسها تخنق انفاس العطور
متنبّيه تمشي على فتنة سجاح
فيها انوثه تكسر الصمت وتثور
جتني وهي بين التشدد والسماح
تسللت من فوق اسوار القصور
صراعها بين المحرّم والمباح
يعمي القلوب اللي تحرك بالصدور
وانا قلبت ل طير مكسور الجناح
وانا العقاب اللي تحاشاه الصقور
حاولت اقاوم وامشي بعكس الرياح
ونزلت كل الاشرعه وقت العبور
قمت اشحذ الهمه وهي اقوي سلاح
واحاول اصنع من ظلام الليل نور
شربت من ماء البحر واصبح قراح
وبكيت لكن كانت دموعي حبور
حتى غشاني النوم واسلمت الوشاح
وايقنت اني نايم ليوم النشور
وجتني بشاره خير والقلب استراح
حلم تسلل في شكل عارف سرور
ولا صحيت الا على حي الفلاح
وقمت احمد الله ربي الحق الغفور