ألا يالله إني طالبك يا عليم الغيب
تديم الستر والأمن في كل الأحوالي
وجودي وجود الزير سالم لأخوه كليب
بعدما مشت لأقدام بالمرقب العالي
أخيل على وادي هده حلة أهل الطيب
بيوتٍ خراب دورها مالبشر خالي
قفارٍ خوالي ما بها غير صوت الذيب
عفيٍ مزارعها من الجال للجالي
وشلّيت صوتي وانثنى لي صداه يجيب
واثاري على قول المثل وحدي لحالي
ونظّمت لي بيتين رتبتها ترتيب
ودمعي من العينين بالحيل همّالي
وتذكرت يوم العيد نحظر شباب وشيب
نصلي نعايد بعض من غير جوالي
وتذكرت كم واحد لنا يكثر الترحيب
يضيّف ولا عنده تجاره ولا مالي
وكنا مثل لاخوان من دون شك وريب
وبعضنا حفي لاقدام ماي ملك نعالي
ووقت العواني ما حد من الرجال يغيب
نشيل الثقايل كلها قصار وطوالي
حياة البساطة قربت بيننا تقريب
وحياة الترف كلن يقول مالي مثالي