يا مترفه زين وجمال ، المعذره ودي أقول
هذا الجمال المترف..العذب..الرقيق..اليوسفي
كيف العيون تناظره ، من غير إعجاب وذهول
والله من شفتك وأنا ، عايش ف حلم(ن) عاطفي
كن الحلا في وجنتك ، متجمّع ب أربع فصول
شفتك وأربكني حلاك ، وشلون أبرر موقفي
حتى الحكي من رقتك ، أصبح مثل طبعك خجول
ياما ترجّيت الكلام ، وياما عصتني أحرفي
وين الغزل ، والأغنيات ، وين الحكي وين الحلول
من قبل لا تترك شفاي ، صارت حروفي تختفي
يابنت أنا صوري ترى ، بالحيل يذبحني الفضول
في بالي أرهقني سؤال ، ليت الإجابه بالنفي
هل يا ترى ه الورده اللي حيّرت كل العقول
مرتبطه أو في قلبها يسكن غلا حب(ن) خفي
قولي دخيلك ما أبي صمتك على صبري يطول
لو كان ردك لي نعم ، قولي ولا تتأسفي
أمّا إذا قلبك خلي ، إعطيني له أذن الدخول
ودّي أعيش بداخله ، وأصير له عاشق وفي
يامترفه المعذره ، ماعدت عارف ويش أقول
والله من شفتك وأنا ، عايش ف حلم(ن) عاطفي