يا ذوق كلك ذوق لو ما حصل ذوق
لو ما حصل لي منك روحه وجيّه
دايم مشاويرك من البيت للسوق
على الأقل مرّي عليّه شويّه
نجلس نسولف ننبسط ندفن الشوق
شاهي منعنع قهوةٍ شاذليه
الله وكيلك ما طرى لبالي يروق
ما دام يدّك ما غفت في يديّه
كني على شان السهر بس مخلوق
ما عاد عندي للسهر قابليّه
بديت احس اني كذا صرت مخنوق
من لهفتي من رغبتي يا صبيّه
ودي لو اصبر بس صار الصبر فوق
ما يحتمل قلبي ويصعب عليّه
عيد الفطر كنّه على الوجه مصفوق
من دون شوفك لين صرت الضحيّه
خمسة عشر ماتوا على شان صندوق
وانا باقدم لك حياتي هديه