مَرقو ليالي البَرد بشهور كانو طوال
و بيَوم راس السنة قلت انتَهى صيامِي
بدي بأوّل شَهر تتغيّر الأَحوال
و اعشق صبية تجي ع قدّ أحلامي
ما حسبت بدها الليالي ترجّع الآمال
و يرجع هَداك العشق ينبُش بآلامي
فتحنا بواب الأمل بلكي العتب ينشال
وقلت اللُقا قالت : انا ع الوعد الزامي
و لمّا التقينا سوا عالصدر في سلسال
يكرُج ع صفحة تلج و يبوّس الشامة
بيني و بينو غمز و قوال ما بتنقال
بيعرف بإنّي أنا هيداك الحرامي
و لمّا بلحظة عشق صار الغزل شلال
غمرتا تَ فاح العطر من توتها الشامي
و لمّا العراوي تفرفدو ردّت ع صدرا شال
قالت دخيلك انا عم ترجُف عضامي
انطر الساعة طنعش بلكي بياض الفال
بلونو بداية عُمر بتصير قدامي
ولمّا الوقت انتصف ما لحقت لمّ الشال
إلا و بيّا انتصَب شيطان قدّامي