بصيت فى جرايد بلدي
حتى الدش والتليفازْ
لاقيت الدنيا إنقلبت
قالو ولد أوباما فازْ
مبروك مستر باراك
دا الفوز ودا الإنجازْ
ومذيعة ليه مبسوطة
من أمريكا والممتازْ
بتقول دى الحرية
ومصر تتعلم م الأستاذْ
ياإخواننا دا إحنا سبقنا الدنيا
قبل الدنيا زمان
وياريت نرجع نبنى
ونسبق تانى كمان
طب عيشوا وشوفوا
معنى كلمة مصر
واسألوا آثاراتها
وصلوا فى جامع عمرو
راح نحيا ونطلع
بره من دا القبر
قال يعنى التعلب يوم هايتوب
وينسى يكون مكّار
وتلاقوا الديب يرعى غنمكو
ويحميها الغَدّار
هاتولى عقل وفكروا إنتوا
عشان العبد إِحتار
قال يعنى الحاج أوباما
هاياجى يصلي خمس صلوات
ويطوف بالكعبة ويخشع عند الركن
ويرمي تلات جمرات
ويفتح خزنة بلده
لكل الفقرا بالزَّكوات
ويدور على بير زمزم يشرب
منه بدل بترول بغداد
ويقول أنا تايب عايد
نادم سامحوني يا ولاد
ويشيل مفتاح القُدس
ويصرخ فينو صلاح الدين
أنا عادل وإنتو غلابة
وها أديكو فلسطين
والله ماعلا كل الخلق
وصان حق الإنسان
وخلى صهيب الرومى
شبه أبو بكر شبه سلمان
غير بس نبيكو محمد
يلا صلوا عليه
وعليكوا بسنة أحمد
وإمشوا على خطاويه
وبلا أمريكا بلا بولوتيكا
بلاها تلات ورقات
وبلاها لعب أونطة
وغش فى الإنتخابات
دا العيب فينا إحنا ولوصلحنا
راح نسبق ونفوز
دا العيب فينا إحنا ولوصلحنا
راح نسبق ونفوز