ربي يحفظ لي شبابك يا حمد
تستمر تسلك طريق الصالحين
يا ذريبٍ والشهامة لك عمد
يا سبوق الخير للشدة عوين
تعطي من قلبٍ عطابا بلا عدد
والمروءة كبَّرت عمرك سنين
كفو عن عشرة رجاجيل ومدد
ربي بَعِّدها عيون الحاسدين
لك على القوة دعائي للأبد
ترتقي وتصير شيخ العارفين
الهقاوي فيك ما خابت بعد
من عرفتك قلت اسنافي أمين
هي ثلاث أيام من بعد الوعد
بس أنا احسبها ثلاث من السنين
العمر ما هو سنين بالعدد
الرجل تخبره أوقات الطعين
والتدين ما هو من صام وسجد
في الأثر إبليس عباد مكين
كل ملفى له عمود وله وتد
راعهم حق يستوي ساسك متين
يا حمد ما بين هجرانٍ وصد
تمضي الأعمار في شوق وحنين
وين أصحاب الطفولة يا حمد
وين عبدالله وعباس وأمين
يا مشينا بين أمطار ورعد
نحمل الشنطة ونستمري الأنين
كم تخاصمنا وتهاوشنا وبعد
عدنا نلعب لما يدركنا الرنين
كل واحد راح في سعيٍ وكد
وانطوت في العمر أيام وسنين
أسأل بحق قل هو الله أحد
نلتقي عند حوض خير المرسلين