وجه الشعر عن ناقص المعرفة لاذ
في وجه من يرفاه ويعز قدره
ذاق المذلة من مدح كل شحّاذ
يبغى الغناة وزاد بالهزل هدره
ولا كل من جاب الشعر جزل وأخّاذ
كم واحدٍ جزله توفّى بصدره
واللي تتلمذ تحت يدّي تتلماذ
لا يجحد المعروف ويزيد غدره
ما فاد تعليمه ولا فاد الانقاذ
عيني على العالي وعينه لحدره
تنعاذ يا بعض الشواعير تنعاذ
أنا اشهد إنّه صار بالجزل ندره
ويا حضرة التلميذ قدامك أستاذ
والليل ما يشفي ليا غاب بدره
يخلّد التاريخ ما قال الأفذاذ
وإلا الودر تبقى له أبيات ودره