قلعتي تيابك

قْلَعْتِي تْيَابِكْ

زَهّرتْ الِمْرُوجْ

وِالنَّارْ حَرْقِتْنِي

وْدَابِتْ عَ صدْرِي تْلُوجْ

بِالْبَردْ حَبْسِتْنِي

مِنْ سَاعِة غْيَابِكْ

خَلِّي إِيدَيِّي تْمُوجْ

مِتل الرِّيَاح الْهُوجْ

عَ بَيْدَر شْبَابِكْ

الْعُمر حلْم زْغِيرْ

مِنْ إِيدْنَا بِيطِيرْ

بْلَيْلِه خَرِيفِيِّه

وْإِنْتِي وْأَنَا مِنْصِيرْ

مَجْمُوعة حْزَازِيرْ

عَ شْفَافْ خَبْرِيِّه

تْجَسّدِي فِيِّي

قَبْلِك كْتَارْ تْجَسّدوا

بْأَحْبَابْ

زَهْرَه مِسِتْحِيِّه

جْبِرْتِي عْيُونِي يِقْعَدُوا

عَ الْبَابْ

وْيِنْطروكِي الْعُمرْ

تَا يْحَوّشُوا عَنْ هَـ الْخُدُودْ السّمرْ

وِالشّفَاف الْحُمرْ

بَوْسَاتْ مِتل الْجَمرْ

لِوَّنتْ شِعْرِي بْأَلْف لَوْن وْلَوْنْ

تَا إِشْلَحُو عْلَيْكِي

ما كِنتْ عَارِفْ رَح بْصَفِّي هَوْنْ

نَايِمْ عَ إِيدَيْكِي

طِفل.. عُمْرِي يَوْمْ

وْإِنْتِي تْغَنِّيلِي

تَا يْطِيرْ مِنِّي النَّوْمْ

وْيِسْهَر مْقَابِيلِي

تْجَسّدِي فِيِّي

صِرْتِي أَنَا مْنِ زْمَانْ

وْمِنْ يَوْم كَان الْـ كَانْ

كِنْتِي بْعِينَيِّي