ليه ياكل الغلا ويش السبب
كيف تجرحني على الجرح القديم
يارفيع الذوق بأخلاق وأدب
مع جمال ٍ،، في، محيّاك الوسيم
اسمك ورسمك بجوفي انكتب
في خفا الخفاّق ماغيرك مقيم
من عنادك ماجنيت الا التعب
شوف همي من فراقك مستديم
عقب ماطبعك تغيّر، وانقلب
وصار أغلب هرجنا سين ٍ وجيم
شبّ جوفي نار وضلوعي حطب
من عذاب ٍ داخل فوادي أليم
مااهتني بالنوم من صالي اللهب
مشعل ٍ في ضامري نارالجحيم
يوم لدت عينك بنظرة غضب
سهم رمشك صاب قلبي في الصميم
أحسبك تفهم، لأغضّاي الهدب
ما دريت إنك،، لمعناها غشيم
نظرتي لك لا، تفكرها عتب
لغز! وتفسيره يبي شخص ٍ فهيم
والهوى راعيه خاسر، لوغلب
ظالم أو مظلوم!! ماعنده خصيم
انشد اللي شاف في الدنيا عجب
ضاع عمره والهوى ماله غريم