اليَا ولت امرك نفوسٍ خسيسه
بينك وبينه فارق الميد والشوح
خلك كما المضطر لأكل الفطيسه
والخمر بالاكراه للمرء مسموح
دون الهلاك ليا حما بك وطيسه
خذ ما يسد من الرمق شهقة الروح
حكم الشريعة لا بغينا نقيسه
نلقى بها باب المحاذير مفتوح
عن منّة ولئم الخبيث ودسيسه
الي يساوم مبدأك بالردى اللوح
كم هقوةٍ صارت واهلها فريسه
بنيان مدمين القفى سم ذرنوح
سم الزعاف ولا لذيذ الهريسه
لو السكوت احيان أوجَع من البوح
وانا على ما قيل عندي نفيسه
ما ابيعها بالرخص لو تزهق الروح
لو تاصل بحتفها لشعيب الخفيسه
ماني عليها مدعي الوجد والنوح
جروح الرفاقة والسنين الكبيسه
ولا تم موضع بالجسد ما به جروح
وحتى الوجوه الي نحسبها أنيسه
صارت مثل غيرها تجي بهم وتروح
ما شفت وجد الوايلي في رئيسه
يومه تمنى الموت لعيون ممدوح