دود الحصيرة زحف والعنكبوت عشش
علي البيان والستاير والقزاز غشش
شوفي التراب اللي بالزوفة علي الكنسول
قومي امسحية ليشوفه جوزك يجي يوشوش
ازاي تحطي صابونة الوش في الكابنيه
ما عند الرف واسع والوساخة ليه
يحطها الدلعدي جوزك علي وشه
تطلع له فيه الحرارة ويشتكي بعينيه
يا منيلة دا اللي من مثلك ما حقه جواز
غلبتي جوزك وعلمتية علي النزناز
مبسوطة لما بسلامته يروح يقول لمك
دي كل ليلة تجيب لي الأكل متعاص جاز
يوم طبخة العدس أشوفك تبقي محتاسة
ما تخلي في البيت لا حله ولا طاسة
وتقعدي تبعتري المواعين في الفسحة
وتبقي أرض المطارح كلها كناسة
عمرك ما تتزوقي إلا عشان بره
وتطلعي بالبوال والصدر يتعري
خللي الزواق والعدل في البيت للراجل
لحسن يكيدك ويأخد بالعجل ضره
ما تمدغيش للعيال الأكل بأسنانك
والنفخ في الأكل مسم فعرض أيمانك
إخيه عليكي بقيتي خصلتك سودة
ما تسمعيش الكلام تننشكي في لسانك
ما تحسبيش من عمايلك ربنا يحبك
بطن الولد توجعه والأكل يتلبك
بعدين يخستك قوي ويموت بالعربي
قلت اللي فيها بقا وذنبك علمي جنبك
الشمس طالعة ولسة الشابة نايمة تجخ
والواد مضحضر ومعري وعامل كخ
يا دي المصيبة، يا شيخة خففي نومك
وهوي كل المحلات دا النفس بيبخ
وحياه مقام النبي خليتي قلبي انغص
من كتر ما ترصي جوا بطون ولادك رص
حرام عليكي لهي بطن العيال شونة