كان اللى كان والمستور بان مش كيفى جنان
ما فاضل الا الحبكمان والزمبليطات
يا قلب بعد ما كنت سعيد تعشق وتريد
الحب نار لو كنت حديدتصبح ما تبات
داللى جرى وصار للعشاق مكتوب فى اوراق
ما بين دلال ووصال وفراق العاشق مات
اجمد شوية وخليك صاغ بلا قلب دماغ
داى شغلة تانية وعايزة فراغ وصفا الاوقات
يا للى تقول الحب نعيم بس انت بهيم
ما يعلمك غير التلطيم بين الجمالات
حسدت عاشق على معشوق لو كنت تدوق
تعلم بان الحب خازوق مش بلح امهات
ما حد منة بلغ املة وركب جملة
يا ما عمل وبلغ عملة بدع الستات
اة لما تاخد مرة ميعاد وتقف منكاد
تقول ما جاتش البنت يا واد
تقف من اتنين تحت الكن لخمسة ترن
لا ست ولا ستوتة تحن على الشحات
ولا اما تتمحك على الباب وييجى البواب
ويسالك اية الاسباب لك ست ساعات
يا يقول عليك سافل ملعون يا يقول مجنون
يبقى ان ما كان دة يكون دة ضرب مقشات
الحب لة تخاييل وامور وتاريخ مسطور
ودعس كبس من المامور عالعربيات
الحب خلا ناسات سهرت وناسات كفرت
وياما ناس فية انتحرت فى الدهبيات
ومش مصيبة اما الانسان شرفة ينهان
لما يكلم دى النسوان با العرضحالات
نسوان بلدنا بقت با لكوم ارخص م الدوم
واللى انا ما متمعشق فية وبروحى افدية
ما شفت لة فى الدنيا شبية ولا فى السموات
من بعد ما احلف بالله احلف بهواة
وعشقى لة طاهر ترضاة كل الديانات
والقلب دة يا نور العين ما يساعش اتنين
غيرك ما فيش يا ام الهرمين معشوق با لذات