وتمر فينا السنين التسع تذكار
الله ليت العمر ماهو زيارة
في ما روت للنوافذ فيّة الدار
عن ضحكةٍ شبت المعنى شرارة
عن صوتها اللي سرد لي حلو الاقدار
والصدفة الموغلة حلم وطهارة
في شارع البنك كان البنك دوار
من كثر ما دار عقلي في مداره
الارصفة من تحتْها غيم وامطار
والحي مغرم بها في كل حارة
مثل الندى شفتها في بال الازهار
تلمع لها الشمس وتذوب العبارة
قررت من حينها تجريب الاسفار
بعيونها السود وبحور الإثارة
واخذت يدها وكن العمر مشوار
لين اشتبكنا وله .. شوق .. وحرارة
ومرت بنا هالسنين بكل الاخبار
نشكر فرحها .. ونندبها مرارة
ما كانت الا عذي الما على النار
ولا كانت الا .. مع الظلما منارة
ولا كان في قلبها ريبة ولا ثار
مهما تردى البخت واقفى شعاره
وان قيل يدري بها علام الاسرار
اقول من وجهها المشرق نظارة
احبها والخلود لحبها صار
مهما تكون الفجيعة والخسارة