يا معلمة

يا معلمة!!.

يا مسيطرة.. ومتمكنة

ياللي على سوق النكد

فاردة الخيام.. ومهيمنة!!

طب كنت سيبي لبكرة حاجة حنيّنة..

نضحك عليه.. لو حتى ضحكة مهرمنة

مافهاش معاني الضحك.. لكن تشبهه.

يخلق من الضحك اربعين..

على كام دعا.. م الحراقين

على دمعتين باردين أوي

من بين عنيكي المكسورين

حبة أونطة محبشين

مع ضحكة صفرة مسرطنة

يمكن في مرة نخدعه

ويحن قلبه بضل حيطة يلم أحزان اللي فات من كذبنا

يستر بلاوي عشقنا

إللي انكتب فوق الرمال

من يوم ميلاده... للنهاية المحزنة

هنقول لبكرة إيه بقى؟

واحنا اللي دايسين فوق كرامته بالنعال

مسكين معانا احتار يداري قبحنا

لما صرخ في وشنا

دا القطة ما بترميش عيال!!

قدمته إيه لبكرة اللي جاي؟

وروني...

... هاتوا العيّنة

هنقول له إييييييه؟؟؟

واللا الدموع..؟

هتشِلّ صوتنا ف حلقنا.. ومات الكلام!!!

واللا ها نهرب وقتها؟!!

والجري نص الجدعنة..!!!

طب والعيااااااااال؟؟؟!!!

دا القربة مليانة حكااااااوي... معطنة

ودا كله من حظي أنا...

... وبختي أنا

مكتوب.. أراده ربنا.

لو لسه عارفة ربنا.!!

يااااااا... معلمة!!.

يا مسيطرة.. ومتمكنة

ياللي على سوق العبط

فاردة الخيام.. ومهيمنة!!