أنا الفلاح
وصدر الأرض وجداني
نسيم الزرع يسحرني
وديك الفجر صحاني
بهمسة حب يأمرني
يطبطب ع القلوب حاني
وريحة الخضرة تسكرني
وحضن الشجرة عنواني
ونور الصبح يأمرني
فاجري بفاسي لغيطاني
كلامي صريح
يقولوا مدب
وم الروعة
أشيل أردب
وع الترعة
أناجي وأحب
بكل الحب دا كلامي
في ظل الغيط دا بتعلم
ولا في صغري
بروح روضة
ولا بلبس بزيف موضة
ولا الاتيكيت لوى لساني
وتعدل راسي
شطفة شاي
وعزف لطيف
بايد ع الناي
ونفسين قص من الجوزة
وهبرة لحمة م الموزة
وفن ربابة من متقال
يقول موال
ألاقي السحر في معاني
ولا بسخط ولا أعاني
وقول ليه الدنيا بيعاني
فقوتي في ايدي
حبة قمح ابذرها
بعرقي ودمي أرويها
وأحرسها وأحميها
يزيد طرح الأمل فيها
وأحصد خيره وأتصدق
بفيض المولى يسترزق
دا كل من أتي ليها
في قرص الشمس
تاه حلمي
وفوق الأرض
موج ألمي
أقولها كمان
وأعيد تاني
بلاش وعلينا تتنمر
فقلبي كما الزروع اخضر
يسيع الكل ولا مغرور
بزيف منظر
حياتي بجد دي بسيطة
وأعيش في سباته
فوق حيطة
وريفنا هدوء
ما هوش. زيطة
جذوري في أرضي مغروسة
وامشي الخطوة مدروسة
بلدنا بجد محروسة
دي أم الدنيا
دي عروسة
وسايدة الكل
بأمجدها
في كتب الحق مدروسة
ولا تحرم ومحروسة