فزوره
والقماش فى الجلابيه
منه تعمل ميت جاكته
والكلام موزون بمعنى
مش بكيلو
أو بالته
أو معبى ف بطرمان
التلاته فى الديانه
كان يهودى
ولا مسلم أو مسيحى
كلنا شايلين أمانه
والامانه من الأمان
التلاته فى العلم
لونه لاحمر دمنا
لونه لابيض حلمنا
لونه لاسود م الألم
فوق الحيطان
التلاته سنين طوال
عاشهم القائد جمال
بعد نكسة خمسه يونيه
كان بيحلم بالقنال
والعروبه تضمنا
فكرونى لما قالت
لسه فاكر كان زمان
التلاته سبعينات
سينا ندهت للسادات
قوم يامصرى وضمها
بوس ترابها الكهرمان
جابها
ضعنا
وبيعنا فيها
والمعاهده لسه شاهده
ع اللى كسبان الرهان
التلاته بسنتين
يابهوت الطيبين
فين بهيه يا أمين
تحكى
مين فينا اللى خان
التلاته بشرطه مايله
والجثث ع الارض سايله
واحنا ماشبعناش
محايله
فى اليهود والامريكان
التلاته
اضرب فى تسعه
يطلع الناتج سنين
ناس بتاكل فيها
والعه
واحنا قال مستنيين
كل حى وله أوان
التلاته أهرامات
خوفو حالف
مش حيمشى
خفرع
ال مش عاجبه يمشى
من قرع أو من وريث
كان إيزيس
أو أوزوريس
طبخوها يا برلمان
التلاته فى مؤتمرهم
اللى باقى من ضميرهم
راح فى غزه وف اريحا
كلنا ف نفس الفضيحه
بس واقفين مانيكان
التلاته
عز بيتنا وعز ابونا
عذبتنا وعذبونا
ليه بنرضى بالمعونه
دوخينا يا لمونه
واعصرينا ف كاس هوان
التلاته ع البلاطه
قولوا
حد اتنين تلاته
جمله فى غاية البساطه
كونوا مره فاعلاتن
كونوا مره قلب واحد
نلتقى بعد الادان
اتصل برقمنا يمكن
تكسب الجايزه الكبيره
زيرو الف وتسعميه
بعدهم
خمسين تلاته
شيلوا واحد م التلاته
نلتقى بعد الاوان...