البرد نمل بجسدي: وانا على جلدي عباه
يا بنت وش حلي معه؟ فصل الحكايا الدافيه
والليل ضايع من يدي: واشوف في وقته حياه
احب منه البينه وأتوق صوب الخافيه
في خافي أضلاعي مدي: يجيه من كل أتجاه
مستوطنين وعابرين أبهم قلوب غافيه
يا بنت بيبين الردي: فينا وذا طوق النجاه
انا علومي وافيه وهوه علومه هافيه
الظاهر العود الندي: حطابته دايم قفاه
الفاس يضرب بظهره ويقول ناسي وافيه
لو طحت يانجم الجدي: ف الكل معروف خطاه
بين القلوب الصافيه بين القلوب الجافيه
العين شرحه يابعدي: والطق ماضر الصفاه
خل العرب تعطيك نظره في البشوت الضافيه
يا بنت يا كثر جهدي: لا ضاع حظي مالقاه
كذا نشيت بلا كبر والنار ماهي طافيه
تدرين لو خف رعدي: يطيح وابل من سماه
اشح وقت الوسم ثم أمطر سحابة صافيه
بين الجمر شفت بردي: ايه اضحكي واخذي وفاه
قلب حنون يشوقه فصل الحكايا الدافيه