الفلاحين:
بنستنى اليوم ده م العام للعام
وبنيجى نبارك لبطلنا المقدام
جايين والنور اللى على جبينه
فخر ل ولاده وأعظمها وسام
قولوا لعيون العالم فى اليوم دا
تشوفنا بلمتنا أحباب وأخوات
يشوفونا بفرحتنا وحنا منصورين
أبطالنا نصرونا ومن يومها منورين
أهل القناة:
غنى ياسمسمية بأحلى الأنغام
غنوا ياصحبجية وأدونى تمام
للبطل المصرى اللى كلنا حبينه
وفرحونا طول مابلدنا ماشيه لأدام
قولوا لعيون العالم فى اليوم دا
تشوفنا بلمتنا أحباب وأخوات
يشوفونا بفرحتنا وحنا منصورين
أبطالنا نصرونا ومن يومها منورين
أهل سيناء:
هلا بحامى الدار صاين كرامتنا
سعد ديارنا وفخر أمتنا
الكل عارفه أكتر ماأحنا عارفينه
وتشهد ديارنا سينا بكلمتنا
قولوا لعيون العالم فى اليوم دا
تشوفنا بلمتنا أحباب وأخوات
يشوفونا بفرحتنا وحنا منصورين
أبطالنا نصرونا ومن يومها منورين
عرب مطروح:
زين نكون معاكو الليلة زين نكون
جاهزين لاجل الوطن ارواحنا تهون
طوبى للى صان أرضه وصان دينه
ودم الشهدا ماننسهوش مهما يكون
قولوا لعيون العالم فى اليوم دا
تشوفنا بلمتنا أحباب وأخوات
يشوفونا بفرحتنا وحنا منصورين
أبطالنا نصرونا ومن يومها منورين
الصعايدة:
ياما دجت دجت ياما دجت دجت فى الفرح طبول
خللى اللى يجول يابلدنا خللى اللى يجول يجول
بيىّ بيىّ بيىّ خيىّ خيىّ خيىّ
عمى عمى عمى خالى خالى خالى
فرحتنا الليلة يابوى نفرحها من جلبنا
غلاوة أبطالنا يابوى دى ساكنة فى جلبنا
نصرونا وجالوا كلمتهم وكانوا جد الجول
خللى اللى يجول يابلدنا خللى اللى يجول يجول
جولوا لعيون العالم فى اليوم دا
تشوفنا بلمتنا أحباب وأخوات
يشوفونا بفرحتنا وحنا منصورين
أبطالنا نصرونا ومن يومها منورين
البحراوية:
أأقرو الفاتحة لابو العباس
وجنود بلدنا دى أجدع ناس
والفاتحة التانية لسيدى ياقوت
واللى يعادينا يطق يموت
والفاتحة التالتة لابو الدردار
واللى يعادينا يولع نار
وبنيجى نبارك لقائدنا العام
جايبين له وردة لجبينه وسام
جولوا لعيون العالم فى اليوم دا
تشوفنا بلمتنا أحباب وأخوات
يشوفونا بفرحتنا وحنا منصورين
أبطالنا نصرونا ومن يومها منورين
أهل النوبة:
احنا ولاد النوبة ونيلك يامصر حياتنا
لغتنا مش مكتوبة وكل ولادك أحبتنا
فخر ومجد..والأمل يرجعّ اللى فاقدينه
هنوا معانا الليلة ال هادونا بطولاتنا
قولوا لعيون العالم فى اليوم دا
تشوفنا بلمتنا أحباب وأخوات
يشوفونا بفرحتنا وحنا منصورين
أبطالنا نصرونا ومن يومها منورين