العيد عيد الله وعيد الوراعين
والا أنت عيدك عيد نجد العذيه
قبل امس وامس وقبل عامٍ وعامين
في كل يومٍ عيد وانت الهدية
يا سيّدي راشد ابمدحك ومنين
وانت العريب اللي عروقه قويه
يكفيك عن كل التشابيه ثنتين
دم الخوال وهيبةٍ وايليه
جاني خبر ان العذارا المزايين
تكرفعن قدمك بنيه بنيه
وجاني خبر ان الفروخ الشياهين
النادرات القطّع الساحلية
اللي على كفك ماهيب للحين
على كفوف اللي لهم مقدريه
وش لك عذر وأبوك لو يصدف الدين
وجه عليه من العطا مدفعيه
عبدالعزيز أبوك ماهو عن الفين
ما فيه اصلاً بالمخاليق زيه
يا سيّدي راشد ابوصيك بأمرين
لو أنت مانت بحاجةٍ للوصيه
احفظ أبوك اللي على العسر واللين
سمحٍ لقاه ومدته حاتمية
اللي عطاك العز من عزة الدين
وأضفى عليك الشهرة العالمية
وحافظ على مجدٍ بنوه العزيزين
عمره مهوب سنين له فوق ميه
وابطلبك طلبة عزيزٍ مسيكين
ماله جدى ياكود جاهك وفيه
ذكّر أبوك إن الرجال الأصيلين
مايملكون الا بطيب السجية
وهو ملكني والله الوالي يعين
في صحبته في حشمته في العطية
قله وسمني مثل وسم البعارين
ويا حلو ميسامه ويا طعم كيه