أنا لولا الغلا هو والمحبة والعيون السود
ما جيتك من قصاي وقلت لك عاشق يا مغتره
وأنا أحبك ومن قلبي احب وماني بمحدود
ولو اني ما احبك كان ليه ازعل واتشره
تمايلتي زعل ولا تثنيتي يا غصن العود
أنا ما أرخصك لو انك تزعلتي ميه مره
تعدي للسحاب وخذي النجمة من العنقود
وخلي للسهر غير الدموع صدور مستره
وخلي للحرير الي على متنك لاهبت نود
مساحه يكسي الأرض بجديله والسما غره
تمشي بين صفحات الوجيه البيض ولا السود
وتسامي لين ما يبقى بحسادك ولا ذره
تعدي كل من يرجي التفاتاتك بكل برود
وخليهم مباليق العيون وجيه مفتره
أبيك بكل ما ربي عطاك من الحلا والزود
وأبي كلك وأبي قلبك وأبي خيره وأبي شره
قضى عمري وانا واقف على باب الرجا الموصود
وأخاف إني ما عاد اقدر اصبر نفسي الحرة
غيابك لعنبو هذا الغايب اللي ما منه فود
كسر حجر الضلوع وضيق الخاطر ولا سره
طلبتك لا تخلين العواذل تكثر المنقود
أنا مضطر وطباع العواذل حيل مضطره