ما بي مرض غير دار العقيلة
وحبس القبيلة
وبعد الجيا من بلاد الوصيلة
ما بي مرض حد النكاد
وشوية الزاد
وريحة اللي مجبرة بالسواد
الحمرة اللي وين صار العناد
عنانها طويلة
لها وصف ما عاد تاجد مثيلة
ما بي مرض غير فقد الرجال
وفنية المال
وحبسة نساوينا والعيال
والفارس اللي كان يقدع المال
نهارة جفيلة
طايع لهم كيف طوع الحليلة
إن كانت خطية
نرمي الطاعة صبح وعشية
نشيل في الوسخ والحطب والمية
معيشة ذليلة
مفيت ربنا يفزع يفك الوحيلة
طايع لهم كيف طوع الوصيف
نسيت الوظيف
بعد بقيتي كنت ضاري عفيف
نشيل الثقيلة
نزازي مزازة من زين حيلة
ما بي مرض غير طولة لجالي
وضيْعة دلالي
وفقدة أجاويد هم روس مالي
يونس اللي كيف الهلالي
كرسي القبيلة
أمحمد وعبد الكريم العزيلة
وبوحسين سمح الوجاب الوالي
والعود ومثيلة
راحوا بلا يوم ذايب ثقيله
ما بي مرض غير فقد الصغار
أسياد العشار
اللي يلقطو كيف تمر النهار
الضرابين للعايب صدار
نواوير عَيْلة
ما ينطرو يقول ناسًا ذليلة
ما بي مرض غير ضرب الصبايا
وجلودهن عرايا
ولا يقعدن يوم ساعة هنايا
ولا يختشوا من بنات السمايا
بقول يا رزيلة
وعيب قبح ما يرتضي للعويلة
ما بي مرض غير قول اضربوهم
ولا تصنعوهم
وبالسيف في كل شي خدموهم
ومقعد مع ناس ما نعرفوهم
حياةً عويلة
إلاَّ مغير ما عاد باليد حيلة
ما بي مرض غير فقد الملاح
ودولة قباح
اللي وجوهم نكب وأخرى صحاح
وكم طفل عصران م السوط داخ
حاير دليله
يا نويرتي صاف من دون جيله
ما بي مرض غير فقدة بلادي
وشي من أريادي
نواجع غرب في خيوط السعادي
طالب الكريم اللي عليه اعتمادي
يعجل بشيله
قبل لا يفوتن ثلاثين ليلة