عزّتي للسهارى والهواجيس طير
لا كفخ ودّك أنّه يا سعد ما يعود
حظّه اللي ينام ولو فراشه حصير
خالي البال ما له في طويل السهود
عزّتي للهواوي وش يفك الأسير!
البلا هو على نفسه يشدّ القيود!
من لمح رمشٍ أرهف من رهيفٍ شطير
ما تعدّى مكانه والليالي شهود
كيف راح الشباب وحلّ شيبٍ غزير!
المطر قبل يهمي له بروق ورعود!
أقبل العمر وأقفى مثل حزّة عصير
ويل من ضاع عمره بين تكفى وكود
يا كثر ما عطينا والف من يستجير
اللي معنا قليل ورغم قلّه نجود
يا كثر من نعرف وخاب ظنٍّ كبير
المراجل من أول كايدة في الوجود
رحمة الله تغشّى وجه يضوي بخير
علم غانم وذِكرٍ طيّبٍ من عقود
بعض الأفعال تغني عن كلامٍ كثير
كلّ من قلّ هرجه زاد علمٍ وفود
حكمةٍ من خبيرٍ قالها لي خبير
طالب العزّ ينهض ما يخاوي رقود
ما لك إلا يمنيك والمقدّر يصير
ومن توكّل على الله غصب يرقى سنود