يا ما كليت من الليالي مقاليب
وكم موقف محفوظ ماني بناسيه
مواقفٍ خلتني أتيه وأشيب
من قبل وقت الشيب تبدي مواريه
والرجل لو ما علمته التجاريب
مثل الحمار اللي به القيد لاويه
ترى التجارب للنشاما مكاسيب
وتعرف علوم الكفو ساعة تخاويه
والصاحب اللي يجلب الشك والريب
لا حد يبي قربه ولا حد يماشيه
والذيب له هيبه بروس المراقيب
والشاه تكثر بالثغاء حين تثغيه
ومن يمدحك بالبهرجه والأكاذيب
يباك تكثر بالعطاء يوم تعطيه
بكره يذمك عند ربعك وأجانيب
ترى العطيه رشوته حين ترشيه
يا ذا الزمن لاقيت منك الأعاجيب
كم ترفع الهامه وصقرٍ توطيه
ما عاد أفرق بالعداء والأصاحيب
ازريت أفرق بين هذا ومن ذيه
والكفو راع الطيب نجزاه بالطيب
وندوس بالأقدام بعض المشاريه
الأقدار تجري والمصايب مخاليب
وما قدر المولى على العبد ياجيه
واللي من أول ضاع عن منهج الطيب
قل له يريح الساق ما عاد يمديه
واللي لاقالوا عيب ما يعرف العيب
مثل الجعل دايم بحمله يدربيه
علته ما يقدر عليها الأطابيب
حتى لو الميسم على الراس يكويه
ما فيه طيب إلا كثير العذاريب
يا ليت مشعاب يمشط علابيه
الرأي بندق يخطي أحيان ويصيب
وإذا كتبت الشعر احكم قوافيه